رمضـان .. فرصة جديدة =))

من أكتر الأغاني اللى بحبها أغنية احنا الشعب و عشان أكون أدق يعنى هى كلمات الخال الأبنودي من قصيدة (( الأحـزان العادية ))
بتقول : احنـا الشعب .. بتوع الأجمل و الطريق الصعب 

اكتشفت انه الأجمل هو دايماً طريقه الصعب .. الغلط هو اللى منتشر و سهل الناس تعمله
يعنى انك تعيش حياتك صح ، قريب من ربنا ، متبقاش متعلق بالناس فمضايق منهم و كل ده هو ده الصعب
بقى عـادى .. انك قاعد مكتئب مش عايز تكلم حد لدرجة انك لما تبقى مروق يقولولك مالك مبسوط ليه ؟!
بقى عادى .. انك مقصر مع ربنا و مش حاطة أولوية و مقصر فى الصلاة و دايماً حاسس بالذنب
بقى عادى .. إنك متسألش على ناس كانوا قريبين منك يمكن كانوا أعز صحابك في يوم من الأيام بس دلوقتى مبتكلموش بعض
بقى عادى .. إنك أحلامك مقتنع إنك مش هتحققها عشان الظروف و أحـوال البلد و الواسطة

كل الحاجات السلبية .. كل الحاجات اللى محدش عايزها هى اللى بقت مسيطرة علينـا
و السبب انه هو ده السهل .. الطريق السهل هو إنك تكسل تصلي و تقول ما هى مش فارقة كتير
الأسهل إنك تطنش حلمك و تحاول تنساه .. تقنع نفسك انه مش مهم اوى عندك .. بدل ما تتعب و تفشل لحد ما تحققه
الأسهل إنك متسألش على حد من مطلق (( ميسألش هو ليه ؟!! )) .. و فى الآخر تتجنب الناس
الأسهل إنك تعيش كده من غير خطة و لا هدف .. عايش اليوم بيومه كله شبه بعضه .. مش عايز تتعب

انمـا انك تتحدى نفسك و توقفها عند حقها تؤدى حق ربك و أهلك و صحابك عليك هو ده اللى صعب ده اللى فيه وجع دماغ
بس لما بتنجح بيبقى نجاح طعمه حلو اوى .. تحس انك مختلف تحس انك قوى .. تحس انك انتصرت على الكائن التافه اللى جواك
بالعكس ده انت بعد شوية بتستمتع جداً بالطريق لغاية ما توصل لحلمك

خـلي رمضـان فرصة انك تتحدى نفسك .. جرب تتغير بجد المرة دى
جرب تصلي كل الصلوات فى معادها و خدها تحدى مع نفسك .. فى الاول هتبقى صعبة بس ربنا هيكرمك =)
جرب تعامل الناس كويس أوى و متستناش منهم أى حاجة خالص فى المقابل .. هتريح دماغك !
جرب تعامل أهلم كويس أوى .. اعملهم حاجة تفرحهم و حط نفسك مكانهم عمرك ما هتضايق منهم أبداً
جرب تتعلم الحاجة اللى طول عمرك نفسك تتعلمها بس مطنش
جرب تكلم صحابك و تقنعهم تنزلوا تصلوا فى المسجد أو تروحوا جمعية خيرية ..

لازم تعرف إنك قوي و لازم تعرف إنه أسهل حاجة فى الدنيا الفشل .. النجاح هو اللى صعب مش أى حد يوصله
قرر إنك حياتك تبقى زي ما بتتخيلها فى دماغك .. و جرب خد فرصة رمضان فى الموضوع ده

رمضــان كريــــــــــــم =)

نتصالح و لا منتصالحش ؟!

ماشية دلوقتي فى البلد نغمة التصالح الوطني..الاخوان فصيل وطني و جزء لا يتجزأ من الشعب المصري مفيش إقصـاء لأي حد .. تمام كل ده كلام جميل كلام معقول مقدرش أقول حاجة عنه 

طبعاً الكلام ده من بعد خطاب السيسي و لكن بعدها بيومين تقابل عدة مشاهد غريبة :

مشهد 1 : اشتباكات ما بين مؤيدين الرئيس و مجموعة معارضين أو بلطجية محدش عارف و مات 16 واحد و طلع الاخوان قالوا كل اللى ماتوا مؤيدين ..

مشهد 2 : بعد أنباء ترددت عن القبض على محمد بديع المرشد العام للإخوان فى مرسي مطروح .. يظهر على منصة رابعة العدوية

            لا و مش بس ظهور ده ظهر يحرض على الجيش و يدعو للعنف و المفاجأة انه طلع دخل و خرج بالنقاب !!

مشهد 3 : البلتاجي و صفوت حجازي على نفس ذات المنصة (( هترك لك التعليق ))

مشهد 4 : القبض على خيرت الشاطر مختبئ بشقة فى مدينة نصر + القبض على حازم ابو اسماعيل و معاه مليون و نص 

مشهد 5 : مشهد ناس بترمي أطفال من على خزان مياه على سطح عمارة و بعد رميهم من فوق المبني .. بيضربوهم و يدوسوا عليهم

ده جزء بسيط جداً من الأحداث من ساعة خطاب السيسي يوم 3/7 من ساعة ما الإخوان سابوا الحكم غصب عنهم .. الأحداث الأخرى أكتر بكتير و لكن دول كانوا الأبرز و المؤكدين في ظل عدد رهيب من الشائعات و المعلومات اللى بتتسرب و تتنفى بعدها مباشرة ..

مرسي طلع قبل عزله بيوم مبيقلش غير كلمة (( شرعية )) من غير ما يعي معناها .. قالها 56 مرة (( فعلاً بدون مبالغة ))

و قال نصاً انه هيدافع عن الشرعية بدمه .. أذكرك عزيزي القارئ بصفوت حجازي (( اللى هيرش مرسي بالمية هنرشه بالدم ))

و طبعاً لا يخفى عليك أنهم معدومي الدم و الإنسانية ..

من الآخـر جماعة ارتكبت جرائم في حق الشعب .. أبسطها يا سيدي لو مش عايز تعترف بيها هى الكذب

مروراً ببلاوي تانية كتير من بيع مصر و تولية الإخوان جميع المناصب و غيره غيره..

لحد ما وصلت لقتل الناس فى الشارع و القتل ده مش بس دلوقتي لأ من زمان بداية من جيكا ..

ده حتى من قبل جيكا من أيام المجلس العسكري اللى كان الناس بتتقتل فى محمد محمود و الإخوان على نغمة : ايه اللى وداهم هناك ؟!

فصيل زي ده تتصالح معاه ليه .. هنا الكلام مش على الإخوان كلهم .. الجماعة فيها شبابها اللى هم أصلاً مضللين

أنا بتكلم على القيادات .. ناس محرضة على القتل و الفتنة و بتستعين بعناصر خارجية عشان تكمل فى الحكم

و تقولي مصالحة !! يعنى انا ممكن اشوف عصام الحداد االلى كان بيطلب المدد من أمريكا شغال فى منصب فى البلد دي !

ممكن أشوف العريان و لا الكتاتني فى برلمان ! .. مش هي دي الجماعة اللى لقوا فى مخازنها سلاح !

تسويد الشاشات اللى قارفينا بيه انه قمع للحريات و بتاع اللى اتسودوا 3 شاشات محرضين

بيحطوا صور المعارضين عليها مشانق ! بيجيبوا صور مظاهرات قديمة على انها دلوقتى

و متقوليش القنوات الإسلامية دول 3 قنوات سياسية .. ما باقى القنوات فاتحة عادى محصلهاش حاجة !!

محدش ضد الإسلام .. الاخوان بس هما اللى ضده هما اللى واخدينه وسيلة مش غاية و قرروا يضحكوا بيه على الناس

بالنسبة للمصالحة فالدم مفيهوش تصالح .. ما كنا اتصالحنا مع مبارك و طلعناه و خدنا الفلوس اللى سرقها زي ما كانوا بيقولوا زمان !

اتصالح ازاى مع حد بيقتل الناس لمجرد انها بتعارضه !! ايه الفايدة اللى هتعود على البلد أصلاً من ناس زي دي !

و اشمعنى ايام مجلس الشعب كنتوا عايزين تصدروا قانون عزل ضد رموز نظام مبارك ؟!

اه هما بوظوا البلد فى 30 سنة بس انتوا بوظتوها فى سنة واحدة بعد ما الشعب خلاص فاق و مش هيسيبكوا اكتر من كده ..

واجب علينا التفريق بين القيادات و الشباب .. واجب التفريق بين قاتل و مغيب و مضلل

واجب علينا اننا مش بس نتصالح مع الشباب اللى فاهم غلط . لا نوعيهم كمان 

هما كمان عايزين مصلحة البلد بس من وجهة نظر أخرى للأسف مضحوك عليهم بيها

و مستغلين تعصبهم و حبهم للدين الإسلامي عشان يتحكموا بيهم

تقدر تقولي أولاد القيادات الكبيرة كانت فين و الشباب دول فى رابعة العدوية !!

محدش يكلمني عن أى تصالح مع قيادات جماعة إرهابية إجرامية ... القصاص للشهداء واجــب و اللى غلط لازم يتحاسب .

...

.

كيف تنظر في يد من صافحوك ..

فلا تبصر الدم .

 في كل كف ؟

إن سهماً أتاني من الخلف

سوف يجيئك من ألف خلف

فالدم - الآن - صار وساماً و شارة

لا تصالح .

                                                 أمل دنقل