الموت ..

المـوت .. الموت زى ما بيقولوا هو الحقيقة اللى مفيش مفر منها .. كلنا عارفين اننا فى النهاية هنموت
ما هو مفيش حاجة او اى مخلوق مهما كان عظيم او جميل او مهم فضـل عايش ..
ما فيش حاجة تقول مين عمره أطول .. مفيش قاعدة تقول انو الأحسن بيموت الأول أو الأوحش بيموت بدرى مثلاً
الأخطـر من ده إنك مش هتعرف انت هتموت امتى و لا ازاى و لا فيــن .. و على فكرة لو فكرت هتلاقى ان ده أحسن
فكر شوية فى السؤال ده .. لو خلوك تختار .. تعرف معاد موتك و لا لأ ؟؟ تختار ايه ؟؟
لا إرادياً فى الأول هتقول أعرفه .. بس فكر شوية كده هتلاقى انو الأحسن لا .. الموضوع ده فكرنى باللى بنشوفه فى الأفلام
 لما حد بيجيله مرض خطير و يقوله انت قدامك 6 شهور مثلاُ بيفتكر ساعتها البطل بقى كل حياته كأنها شريط سينما قدامه
الواحد بيتعلق بالحياة و هو عمره ما كان متعلق بيها كده !!
 مرة واحدة بيعرف قيمتها .. مرة واحدة بيحس اد ايه هو ضيع وقت فيها .. زعل مين .. اتخانق مع مين ..
 و كله فى ثانية بيحس انو ملوش معنى..
طيب دلوقتى يعنى احنا بنتولد عشان نموت .. طب ايه لازمته ..
لازمته انك لازم تسيب بصمتك لازم تسيب علامة لازم تسيب حاجة الناس تفتكرك بيهـا لازم تسيب حاجة تقابل بيها ربنـا
الناس اللى مشهورين لو انت متعرفهمش شخصياً هتلاقى مفيش فرق هما عايشين و لأ .. لانهم دايما حوالينا ..
صلاح جاهين .. نجيب محفوظ .. أنيس منصور .. أم كلثوم .. و غيرهم و غيرهم الناس دى لسه موجودة على فكرة
انا دلوقتى لو قريت كتاب لصلاح جاهين دلوقتى و لا قريته أيام ما كان عايش .. هتفرق فى حاجة ؟؟
الأهم من وجودك فى الدنيا .. انت هتسيب ايه فى الدنيا ما أنت كده كده ماشى و كلنا ماشيين .. هنسيب ايه ورانا ؟؟
على فكرة اللى هتسيبه ده مش لازم يبقى عمل عظيم و لا لازم عشان الناس تفتكرك تبقى مشهور ..
ما هو أبو جهل مشهور عادي يعنى .. مش هى دى النقطـة !!
الموت انت مش بتتحكم فيه لكن تقدر تتحكم فى الحاجات اللى هتسيبها .. كأنه فى موت تانى .. موت الفكرة .. موت الإبداع
انك تقرر تعيش ميت بتصحى الصبح عشان تخلص اليوم و خلاص .. مش فاهم عايش ليه ..
 مبتعملش حاجة لنفسك و لا لحد و لا لربنا .. طب انت هنا بتعمـل ايه ؟؟
الأســوء لما حالة الاكتئاب و الاحباط تسيطر عليك بقى و تقول عايز أموت .. عايز تموت .. بجد !!
طب فكر للحظة واحدة كده (( هتكتشف لا مؤاخذة تفاهتك )) انت موجود هنا مش بمزاجك و مش هتموت بمزاجك
ربنا محددلك المدة اللى هتعيش فيها دى فى المكان ده مع الناس دول لسبب معين .. مش صدفـة يعنى
انت ممكن تفهم السبب ده بسهولة و ممكن تتعب شوية و تقعد تدور عليه و ممكن تعيش حياتك كلها متلاقيهوش ده قدرك
لكن الأخطر انك تعيش مش واخد بالك مش ناوى تجرب تدور عليه .. مش عايز تعرفه او انت عارفه و مطنشه
محدش ضامن عمره .. ماحدش عارف هينام النهاردة هيصحى بكرة و  لا  لأ ..
 محدش صامن هيعيش لثانية كمان و لا لأ... لو بصيت على كم الوقت اللى بتضيعه هتتفاجئ !!  بتضيعه فى ايه !! و بتكسل ليه ؟؟ مبقولش انى انا الفظيعة اللى طول النهار بعمل حاجات مفيدة و مهمة و مبكسلش و كده .. لا الكلام ده لنفسى انا كمان بس مهما ضيعت وقت مش مهم المهم دلوقتى المهم بتعمل ايه دلوقتى .. المهم انك تحاول تانى مهما فشلت او وقعت او كسلت قوم تانى ..
 ما انت مفيش قدامك غير انك تحاول لحد اخر نفس فيـك ..
باختصار الحياة أقصر بكتير من إنـى أضيعها فى انك اكسل او احلم بحاجة و مشتغلش عشان احققها
او اضيع وقتى و اعصابي فى انى ازعل من حد و لا اتخانق معااه .. انا مش عايزة اعيش و اموت كده
عــادى .. زى ملايين عاشوا و ماتوا و ولا كأنهم كانوا هنا .. عايزة اسيب علامة .. عايزة اعمل فرق مهما كان صغير
المهم انى متستلمش و افضل أحاول لحد الآخــر ..

؟!

عـلى فكرة الناس مش شايفاك زى ما أنت شايف نفسك

و مهما حاولوا يشرحولك هما شايفينك ازاى مش هتعرف بالظبط

فكبــّر دماغك و اعمل اللى أنت مقتنع بيـه ..

اكسر الروتين

اكسـر الروتين .. متخليش الأيام شبه بعضهـا

خلي كل يوم مختلف عن اللى قبله

حط فى كل يوم حاجة معينة تعملها

عشان تحس بالاختلاف بين الأيـام و تحس إنك عملت حاجة

خليك مختلف و متخليش الجو السلبي و الشكوى يأثروا عليـك

ابدأ بنفسك و اعمـل كـده و بعد كده الناس هما اللى هيقلدوك    =)

على فكـرة لو فضلت ساكت كده .. محدش هيعرف ايه جواكـ
و لا حــد هيساعـدك و لا حــد هيحس بيــكـ
طـول ما مشاكلك محبوسة جواكـ متستناش من حـد يساعدك
فضفض .. عيـّط .. اكتب .. ادعى ربنا >> المهمـ تطلع اللى جـواك
و فكـر تخرج إزاى من اللى أنت فيه .. بدل ما تكتمه جواكـ و تعبّي