دين الغلابة !

مفيش حاجة فى الدنيـا اسمها الصح المطلق و الغلط المطلق في حاجات كتير مفيهاش أبيض و أسود ..

 التصرف الواحد أحياناً فى موقف يبقى غلط و فى موقف تاني يبقى عين الصواب

ربنا سبحانه و تعالى فى حاجات و أحكام أنزلها واضحة ..و ساب حاجات كتير كده مبهمة مش واضحة تحتمل أكثر من تفسير ده ليه ؟

أكيد مش عشان - استغفر الله العظيم - ملهاش تفسير معين أو يعنى ربنا عاجز يحطلنا فيها قول فصل

و لكن ده عشان ربنا يخلينا نفكر .. عشان الحاجات اللى بتختلف من زمن لزمن

عشان معظم آيات القرآن بتنتهى بـ(( أفلا تتفكرون )) (( أفلا تعلمون )) .. ربنا أمرنا بالتفكير و إعمال العقـل

دين الإسلام هو دين عبودية لربنا بس مش دين غصب .. مش معنى انك تسلم لربنا و تستسلمله انك متفكرش

المفروض انك بالعقل توصل لربنـا .. تعرفه فتحبه فتطيعه .. و الناس اللى عملت كده هى أكتر ناس كانت متدينة و فاهمة الدين صح

المشكلة فى مجتمعنا دلوقتى الواحد مش عايز يفكر .. مش عايز يتعب نفسه .. خايف يفتح على نفسه فاتوحة

طيب ما هى المسيحية و البوذية و الهندوسية هدفهم نشر السلام و الخير

مفيش دين و لا فكر شايف ان القتل و الظلم و الكذب و النفاق حلوين و لا فى دىن بيشجع عليهم ..

و لا في دين بيقولك ابعد عن الخير و لا إيــاك تقول الصدق

لو انت خايف تتعرف على دين تاني و لا منهج تاني عشان خايف على ايمانك يبقى ده ايمان مش ثابت

اعتقادك مش قوي معندكش يقين حتى لو انت مش عارف ده

دايماً يقولك بعد ما تموت و تتدفن فى القبر تجيلك الملائكة تقولك .. ما هو دينك .. من هو ربك ؟؟

ما هو أكيد التحذيرات الكتيرة من الموضوع ده مش من فراغ .. كلنا دلوقتى عارفين مين ربنا و ايه الدين بتاعنا

بس ساعتها انت لسانك بيجاوب بما فى قلبك باللى عندك يقين و اعتقاد ثابت فيه .. و  هى دى الفكرة

المشكلة مش فى انك ميبقاش عندك اعتقاد المصيبة الكبرى  انك تبقى فاكر ان اليقين عندك و هو مش موجود

الخوف من التفكير مش هيحميك من المجهول .. لو كده مكنش ربنا خلقك انسان مفكر و عندك عقل .. لا و كمان أمرك بالتفكر

المشكلة ان الناس بتستسهل .. انا بلاقي فى البرامج الدينية أسئلة غريبة وعن حاجات بديهية جداً  

و بعدين الأسئلة المكررة مثلاً دليل على ان اللى بيسأل محاولش يفكر أو يدور مسبقاً على إجابة السؤال لانه لو دور كان لقاها

فكرة الاستسهال و الكسل عن التفكير بتخلى الناس تاخد المعلومات بالمعلقة من الشيوخ أو أى راجل بتاع ربنا كده

بذقن بيضاء ناصعة البياض .. مع شوية كلمات لغة عربية .. و جزاك الله خيراً و بارك الله فيك أختاه ..

طبعاً السؤال دلوقتى ايه المشكلة فى اننا ناخد معلوماتنا الدينية من الشيوخ ؟! أو يجي واحد لطيف يقولى ازاى تتكلمى كده عن الشيوخ !

أنا مش بقصد بكلامي عامة الشيوخ .. أنا بقصد الناس اللى بتدخل المجال ده بغرض تحقيق الشهرة مثلاُ

و دول ينقسموا لجزئين جزء يتخذ أسلوب الترهيب و يبدأ يتكلم بلهجة قاسية كلمات غير مفهومة من العصور الجاهلية

مع رفع نبرة الصوت و صوت غليظ أجش .. يخوفك من عم الشيخ نفسه .. و كل الكلام على عذاب القبر .. اللى مش منقبة متبرجة

ازاى الراجل يكون من غير ذقن ؟ّ!! و ما إلى ذلك من الفتاوى الغريبة و الفكرة ان الناس تقتنع بالكلام و تردده

لان اكيد اللى دينه متزمت كده هو الصح .. هو ده الاحترام و احنا في زمن منحل .. 

أما التيار التاني .. يمسك فى ناحية الترغيب بس برضه باستسهال .. يصدر فتاوى تريح الناس

يحاول يستهدف الشباب (( فى ناس كويسة مركزة على فئة الشباب طبعاً )) أنا قصدى اللى هدفه يستسهل و يتشهر

و تلاقى الموضوع بيتقلب من ترغيب لمعيلة .. و تبدأ .. انا شايفك ياللى مصلتش على النبي !!

أمـا آخـر فئة أعتقد انها واضحة جداً دلوقتي و متصدرين الساحة .. اللى بيستخدم الدين فى السياسة

اللى بيستخدم الدين عشان يضحك بيه على الناس عشان يكدب بيه !! .. و ده فى نظري أقذر الأنواع

أنا لما أروح لواحد غلبان و بسيط و ثقافته على قده و ده طبعاً بناء على التعليم رفيع المستوى فى بلدنا الجميل

و أقوله بص يا حاج .. الراجل ده بيصلي و بتاع ربنا و هيساعدنا .. أما ده ده بتاع الغرب ده عميل للأمريكان ده علماني !!

الراجل البسيط اللى بفطرته عايز يقرب من ربنا بأى طريقة هيختار إيــه ؟! .. العيب مش على الراجل

و احنا (( الطبقة القليلة اللى عندها أى قدر من الثقافة أو الوعي )) الغلط علينا لاننا موعيناش الناس دى

الغلط مش على الراجل الغلبان .. الغلط مش على اللى بيقبل زيت و سكر .. الغلط مش على حمادة صابر

 و لا على الناس اللى بتخرج تزعق فى مظاهرات الشرعية و الشريعة .. الشرعية و الدستور أى حاجة من الكلام ده

العيب على اللى قاعد فى قناة مخصصها لشتم ناس .. و شتيمتهم لانهم ضد الاسلام .. مفيش مشكلة فى ان الشتيمة حرام

الموضوع يصبح مسموح به مادام فى سبيل الاسلام .. هو بيعامل نفسه على انه حامى الاسلام و رافع رايته و بالتالي أفعاله مقدسة

المجتمع 3 طبقات .. طبقه عليا عندها جزء ضئيل من التعليم و الثقافة 

طبقة وسطى و دى اللى غالبا مكسلة تفكر .. ماشية بالبركة و عايزة استقرار الحال

و الطبقة الأغلب من الشعب اللى همه ياكل و ينام فى سلام من غير ما حد يجي حنبه و لا جنب عياله ..

المسئولية كلها على الطبقة اللى فوق فى توعية اللى أقل منهم عشان يشكلوا قوة تطالب بمطالب واحدة .. و يكون فى ضغط بجد

و يحققوا المطال للطبقة البسيطة دى .. انما مينفعش تطالب ناس بسيطة بانها تنتخب فلان الليبرالي و الاسلامي كخ

ماهو اكيد لما تقوله اسلامي كخ .. هيقول عليك عدو و عميل

احنا انشغلنا بالخناقات فوق و سبنا الناس دى تدخل للغلابة و تتمكن من عقولهم ..

 مش بس بقوا بيحبوهم .. دول عرفوا يزرعوا فيهم كراهية أى حد ضدهم لان اى حد ضدهم ضد الاسلام ..

أفكـار ملخبطـة ..

..~

النـاس في منهم الكويس و الوحش

مينفعش تقنع نفسك انهم كلهم وحشين

أولاً لأن ده مش صح

ثانياً لانك مينفعش كبني آدم زيهم تحكم عليهم

و طول ما أنت مركز على الوحش مش هتشوف غيره

فحاول تركز على الكويس عشان تعيش مرتاح =)

..~

أمـك و أبوك مهما عملوا و مهما قالوا

و حتى لو من وجهة نظرك غلطانين

أو بيحبطوك أو مش بيشجعوك على حلمك

دول فى الآخر اللى جابوك الدنيا و ربوك 

و خلوك أصلاً تبقى بتفكر و ليك حلم و هدف

فمهما حصل منهم متزعلش .. هما فى الآخـر هدفهم مصلحتك 

..~

معرفة الناس كنوز

ده بجد على فكرة كل شخص بتقابله بتتعلم منه

سواء شخص كويس أو وحش

قريب منك أو عدوك و المدهش بقى

إنك بتتعلم من الناس اللى بتأذيك أكتر بكتير

من الناس القريبيين منك .. مفيش حد معرفته خسارة

اعتبرها دروس و خبـرة فى الحياة 

..~

فى نـاس ممكن يكون هدفهم فى الحيـاة

انهم ينكدوا عليك و بقرفوك فى حياتك 

و يحسسوك انك ولا حاجة .. العيب مش فيك

دول عندهم عقدة نقص و انت متعرفش ايه ظروفهم

ممكن يكونوا متخيلين انهم بيثبتوا نفسهم بانك تبقى اقل منهم

دول غلبانين .. مفتشغلش بالك بيهم

و متفتكرش إن العيـب فيك و كبر دماغك

..~

لو عندك فى حياتك من قرايبك 

والدك .. والدتك .. صحابك

بيقولك تعالى نصلى أو نعمل اى حاجة خير

اوعى تفرط فيه و اعرف انو ربنا باعتهولك

..~

لو في إيـدك انك تعمل حاجة كويسة لحد

اعملها على طول و من غير ما تفكر

و متستناش مقابل هتحس بسعادة رهيبة

سعادة انك بجد تدى و انت مش مستنى تاخد

و فى الآخــر هتاخد اللى تستاهله من عند ربنا =)  

..~

فكـرة الأبيض و الأسود ساعات كتير بتبقى مش صح

أغلب الأوقات بيكون الصح انك تمشى بالحل الوسط

تعرف ناس علاقتك بيهم مش قوية اوى و لا وحشة

يعنى لو فوّت صلاة متقولش مش هكمل باقى الصلوات صلى الباقى

و اهو 3 صلوات احسن من ولا واحدة =)

..~

فى اللى بينصحك عشان يضرك

و فى اللى عايز يفيدك بجد

بس فى الآخـر كله ينصحك بناء على 

أفكاره و معتقاداته و تجاربه الشخصية

فى الآخر خد النصيحة عشان تستفيد من وجهة نظر مختلفة

و تشوف الموضوع من زاوية تانية .. بس فى الآخر

اعمل الى تقتنع بيه و اللى قلبك حابه =)

...~

احترامك للناس و تعاملك الكويس معاهم

ملوش أي علاقة بيهم .. كله ليك فى الأخر

انت بتتعامل كويس لانك بتتعامل باخلاقك انت مش باخلاق غيرك

متقولش انا بعاملهم زى ما بيعاملوني  

انت كده خلتهم يأثروا عليك .. اكيب نفسك و عاملهم كويس

ربنا هيرضى عنك و هيبعتلك اللى يعاملك بأحسن مما تتخيل

..~

استحالة الناس تحبك و انت مش حابب نفسك

و لا تثق فيك لو انت مش واثق فى نفسك

يعنى انت ذات نفسك مش واثق فيهم

عايزهم يثقوا فيك ازاى ؟؟

خلي عندك ايمان ان كل بني ادم مهما كان وحش

ليه حد يحبه و ربنا خلقه لسبب

الكون أكبر منك بكتيير .. كل ما تفكر فى كده

هتلاقي انك مكبر مخاوفك و عامل زووم ان على نفسك

...~

حاول تصفي نيتك و تسامح الناس

و متشلش فى قلبك كتير .. صعب انا عارفة

و انا بحاول اعمل كده و بفشل كتير

بس لازم تفضل تحاول لانه كده انت اول واحد هتكسب

و انت اللى هتريح دماغك و هترضي ربك

...~

الدنيـا زى ما انت بتشوفها .. انا شايفاها غيرك غير اللى جنبك

كل واحد عنده حاجات مرتبطة بالسعادة غير التاني

السجارة اللى بالنسبة لك سعادة بالنسبة لى مش بتشكلي أى أهمية

و متعة شراء الكتب بالنسبة لي نفخ بالنسبة لك !!

فحاول تبص بنظرة أوسع و تعرف ان مش كله شايفها زيك 

فمتلومش على اللى يخلتف معاك و لا تعامله على انه متخلف

الشخص الاسلامي

كثر الحديث هذه الأيام عن (( الإسلاميين )) أو التيارات الإسلامية فى السياسة

خاصة مع زيادة الكلام عن السياسة فى كل مكان و كثر (( الفتي ))  إن جـاز التعبير

و الكلام هنا عن لفظ (( إسلامي )) هذا اللفظ الدخيل الذى لم نكن نألفه من قبل لوصف إنسان يدين بالاسلام

فالاسم الذى يطلق على من يعتنق الدين الإسلامي  لفظ (( مسلم )) و لكن كلمة (( إسلامي ))

يمكن أن توضع مثلاً بعد كلمة مثل الفقه  ليكون (( الفقه الإسلامي )) أى الفقه الخاص بالدين الإسلامي

لآن هذه اليـاء  هى ياء النسبة  بمعنى (( الفقه المنسوب للإسلام ))

و لكـن الله سبحانه و تعالى لم يقل أننا يجب أن نكون إسلاميين بل مسلميين 

و لم ترد كلمة (( إسلامي )) لا فى القرآن و لا السنـة فمن أين جاء هذا اللفظ ؟؟ 

إن لفظ "الإسلاميين" استعمل في مجال الأدب مثلا نقيضا للفظ "الجاهليين"، وذلك للتمييز بين من عاشوا في الإسلام

ولم يدركوا الجاهلية، ومن عاشوا في الجاهلية ولم يدركوا الإسلام، فالجاهليون ينتسبون تاريخيا إلى العصر الجاهلي،

بخلاف الإسلاميين الذين ينتسبون إلى عصر الإسلام و لا علاقة لهذا أيضا بعصرنا الآن !!

و لكننا الآن أصبحنا نطلق هذا اللقب على من يؤمن بمشروع سياسي أساسه الإسلام 

و هكذا كثر الإسلاميون أو مدعو الإسلام في مجتمعنا  

فالشخص الإسلامي هم من يريدها إسلامية إسلامية ..

فلا يمكن للدولة أن تكون مدنية و الليبرالية و العلمانية حرام و الديمقراطية كفر ..

الاسلامي هو من يهتم بلحية الرئيس أكثر من كفاءته و أدائه

الاسلامي هو يرى الأغاني و الموسيقى حرام و لكن لا مانع من بعض الأناشيد

الاسلامي هو يرى أن دور المرأة لا يتعدى حدود منزلها

الاسلامي هو من يرى أن مشكلة التحرش يقع فيها الخطأ على ملابس الفتاة و ليس على المتحرش

الاسلامي هو من لا يرى فى الدين الا مظاهره

الاسلامي هو من لا يرى المذنب بل كل ما يراه (( هو إيـه اللى وداها هناك ؟؟ ))

الاسلامي هو من يتباهى بكثرة العدد و قدرة على حشد أكبر عدد من البشر

الاسلامي يرى انه يتصرف باسم الإسلام و بالتالى أفعاله مقدسة و لهذا فمن يعارضه هو عدو الإسلام

الاسلامي هو من يبرر لنفسه أى فعلة .. فهو حامٍ للاسلام

الاسلامي هو من لا يعرف بحق ما هى الشريعة الإسلامية و إلام تهدف

الاسلامي هو من يؤمن بمبدأ الترهيب لا الترغيب .. فاذا لم تكن معه فأنت عدو الله

الاسلامي لا يعترف بخطؤه بل لا يرى انه من الممكن ان يخطئ

الاسلامي يرى أنه فوق الناس .. فهو أرفع منهم و سائر الناس أدنى منه

الاسلامى هو من يهتم بتعريفه (( كاسلامى )) و أن يعرف بلحيته و جلبابه بدلاً من أخلاقه

لا علاقة لهذا بالإسلام  يكفينا أننا مسلمين .. و كفى الصاقاً بتهم لهذا الدين العظيم

و كفى تشويهاً له بأفعالكم و حديثكم الذى لا يتصل بالاسلام لا من قريب و لا من بعيـد .

من سنـة

النهاردة عيـد ميلادي xD

بغض النظـر عن إنـي طول عمري مبسوطة انو يوم 4/4 .. عشان بحسه تاريخ حلوو xD

المهـم يعنـي لما صحيت النهاردة اكتشفت أنوو من سنـة حاجات كتيرة أوى أوى اتغيرت

حاساها حصلت بسرعة و فى نفس الوقت حاجات كتير حصلت اكتر من الوقت اللى عدّا

من سنـة .. مكنتش فاهمـة الناس كده 

من سنـة .. كان فى ناس فاكراهام كويسين و طبعاً طلعوا ...

من سنة .. كان فى ناس ندمت على إنـي عرفتهم 

من سنة .. عمرى ما كنت اصدق اللى حاصل دلوقتى

من سنة .. عمرى ما كنت هتعامل على ان الحاجات دى عادى 

من سنة .. كل حاجة كانت بتأثر فيّا أكتر من دلوقتى

من سنة .. كنت فاهمة حاجات كتير غلط

بس أنـا مش زعـلانة من ده كله .. حاسة إنى اتعلمت حاجات كتير أوى و اتغيرت فى حاجات كتير أوى

يمـكن المشكلة دلوقتى انى فى حالة انى مش مستوعبة من كتير التغيرات اللى حصلت ..

بس أكييـد بعد شوية هيبقى عادى و لما ابص كده هعرف اد ايه اتغيرت (( للأحسـن يا ريت يعنى !! ))

فى خلال السنة دى ..

 عرفت انو مش اللى انت عايزة لازم يحصل ممكن بس شوية منه .. ممكن ميحصلش خالص بس ده أحسن حاجة ليـا

بقيت من جوه مقتنعة بجـد انو الحاجة اللى هتحصل لو مش عاجبانى فهى كويسة عشان ربنا اختارها حتى لو انا مش فاهمة ليه

و الحاجات اللى هموت و تحصل و مبتجيش هتيجـى بس فى وقتها المناسب .. او ممكن متجيش  مش عارفة بس برضه ده أحسن !!

عرفت انو مش معنى انو انا مختلفة مع ناس .. او مش بحبهم .. او مش قريبين منى انى اقطع علاقتى بيهم 

بالعكـس اكيد انا الخسرانة من ان علاقتى بأى حد تتقطع .. خليها موجودة بس بحدود .. ادينا بنتعلم و كلن بشر فكلنا هنغلط ..

عرفت ان الحاجة الصح .. الناس اللى بيعملوها و مقتنعين قليلين اوى و انى لازم اكون من دول 

و عرفت انو الاختيارات الصح ربنا بيحلطنا قدامها 100 امتحان يشوف احنا هنثبت و لا لأ 

عشان كده اتعلمت انى اعمل اللى انا مقتنعة بيه و شايفاه صح بغض النظر عن أى حاجة تانية

بجد يعنى أستاذ غسـان مطـر مكنش بيهزر لما كان بيقول لحزلقوم (( اعمـل الصح )) .. دى بجد اهم نصيحة فى الحياة !

عرفت انى مش محتاجة ناس كتير .. صاحب واحد أصلى أبرك :D

عرفت انو حلمـي مش مهم أى حد يقتنع بيه غيري .. كفاية انى انا شايفاه ممكن و هيبسطنى و هيفرحنى :D

عرفت انو مش كل اللى مش عاجبنى هعرف اغيره و لا مطلوب أصلاً أغيره ..

عرفت انو بجد انك تخلى الجنيا متغيركش دى حاجة صعبة بس ليها قيمة ..

عرفت انو مش معنى اللى نفسك فيه مش حاصل دلوقتى انو مش هيحصل خالص

عرفت بجد انو المشكلة يك مش فى الظروف .. 

عرفت انو معرفة الناس دى بجد كنز و بتتعلم منها حاجات كتير اوى :D

أنــا رغيت كتير أوى .. وكله كلام عن نفسي .. بس كتبته عشان حاسه انو ده موجود فى حياة كل حد فينـا بس بشكل مختلف !!

كل سنة و أنا طيبة xD

حــالة ..

عن الوقت اللى مبفهمش فيه نفسي .. معرفش مالي

زى ما اكون مضايقة بس مفيش حاجة معينة مضايقانى !!

بحـاول اهرب من نفسي .. بس كل ما افتكر اني ببعد عنها و بهرب منها 

اكتشف اني بقرب منـها أكتر و بغرق فيـها و مش عارفة اخرج منها !!

حاسة ان كل حـاجة ملهاش معنى .. لا الناس و لا أنا و لا الحياة أصلاً

هى تلك الحالة التى تتملكنى فتخلينى مش قادرة أسمع أى كلام من أى حـد

و لما ابعد عن الناس و اقعـد لوحدي أخـاف . و أحس انى محتاجة اسمع اى حد بيتكلم

حتى لو مش بيكلمنى انا بس احس بوجودهم .. احس انى لسه هنـا

احاول اعدي اليوم بأى طريقة .. مفكرش فى حاجة .. 

اشغل نفسي بأى حاجة تافهة زيادة عن اللزوم

بس فى الآخــر لما يجي الليل و مفروض أنـام

بلاقى نفسى لوحدى .. أنا و نفسي مش عارفة أهرب منها

و لا عارفة أواجها و خايفـة منها .. ليـه معرفش !!

ياه ع الحـوار

يوم عادى جداً زى الأيـام اللى عمالة تعـدى و كلها شبه بعضها ..

 بقلب فى التليفزيون بالليل

و اتنقل ما بين برامج التوك شو اللى بقت اكتر من قتوان الاغانى و الأفلام .. 

اتفرج على واحد و ازهق و اغير القناة

مفيش جديد نفس الكلام و نفس الحوارات كل يوم .. و بالتـالي نفس النتيجة :

ضيف 1 : لا لا اكمـل كلامي .. لو سمحت أكمل كلامي لسه مخلصتش !!

ضيف 2 : حضرتك مدتنيش فرصة اصلا اتكلم !

المذيع : يا يا ..

ضيف 1 : المهم بقى اللى حصل ....

المذيع : يا استاذ فلان لو سمحت ....

ضيف 1 : بعد اذنك بس ..

المذيع : اصل الوقت خلص مضطر اقفل الحلقة 

ضيف 2 : لا لو سمحت انا ماخدتش فرصتى و مقطعتوش زى ما قاطعني !!

المذيـع : تصبحوا على خير .. نتقابل بكرة فى حركة جديدة (( الضيفين بيتخانقوا فى الخلفيـة )) .

من سنتين بالظبط .. معتقدش انو الحال اتغيـر عن كده ..
 فيما عدا انو عدد الدقون بيزيد مع مرور الوقت ..

هما دول اللى بيطلعوا فى التليفزيون يتخانقوا .. 
همـا دول اللى بيقولوا عليهم النخبة .. نخبـة ايه دى !!

يعنـى أفهـم من كده انو النخبة دول هما الناس المثقفين او اشباه المثقفين 

اللى بيتعاملوا على انهم لوحدهم هم الفاهمين

و ربنا خصهم بالحكمة و العقل و التنبؤ باللي هيحصل
 و التسبب فى اكتئاب للى بيكلموهم !!

النخبة هم الناس اللى بتيجى تتخانق فى سبيل انو كل واحد يطلع صح و يطلع التانى غلطان !

طب البلد هتستفيد ايه ؟ .. طب انا كمشاهد هستفيد ايه !! .. طب انت نفسك كده استفدت ايه !!

الحـوار اللى بيتذاع اللى مفروض انو بين النخب و صفوة المجتمع اللى بنتعلم منهم مبقاش حـوار

عندنا مشكلة فظيعة في مفهوم الحـوار نفسه .. 
يعنى ايه حوار انى اتكلم معاك عشان اطلعك غلطان ؟؟

اثبتلك انك كافر ؟؟ .. اثبت انى احسن منك ؟؟ .. اثبت انو الأغلبية معايا ؟؟ 

.. اثبت انو انا صوت الحق بس مش مسموع ؟!

الحوار متعملش عشان كده ..اللى بيحصل ده اسمه خناقة
 ممكن تتكلموا كده فى الشارع فى بيتكو بس مش على التليفزيون !

المفروض فى تعريف كلمة (( حـوار )) أصلاً انها اشخاص بيتكلموا عشان يوصلوا للصواب يعنى للصح

و الصح ده المفروض اللى فيه مصلحة البلد يعنـي مصلحة الـ2 يعني محدش يطلع خسران !

لما تبقى دى هى سمات الحوار بين علية القوم و المثقفين بتوع المجتمع يبقى هتستنى ايه من باقى الشعب ؟

كل مكان بروحه اياً ما كان لازم يحصل فيه نقاش ملوش هدف و لا نتيجة و بينتهى لولا حاجة

و طبعاً مؤخراً لازم يبقى حوار و كلام فى السياسة .. كل واحد بيقول اللى عنده

تحس من غير وعى الهدف هو انو الشخص التانى يقر انك صح و ان هو غلط ..
 طب حط نفسك مكانه

ما هو ده مش هيحصل لانو عنده كلامه اللى مقتنع بيه و حتى لو اقتنع بكلامك مش هيبينلك ده 

و انت كل هدفك فى الحيـاة انك تطلعوا غلطان و انت الفظيع اللى بتفهم !!

بس على فكرة العيب مش فى الحوار .. 
لانو الحوار ده هو الطريقة اللى ربنا اختارها للرسل فى هم يقنعوا اقواهم بالدين

طيب و اللى كان بيحصل فى الاغلب ايه ؟؟ 
الناس دول مكانوش بيقتنعوا .. بيقولوا عليهم مجانين سحرة . إلى آخر ذلك

و بالتالي المشكلة كمـان للاسف مش فى ان الطرفين غلطانين 
بالعكس حتى لو معاك الحق ممكن ميبنش فى وسط النقاش

و فى وسط الزحمة دى ..
 ما هو الرسل و الأنبياء كان الحق معاهم و لكن الحوار فى اغلب الأوقات كان بيفشل فى اقناعهم !!

كمـان ممكن تكون المشكلة فى طريقة تعبيرك مش فى انك غلطان ..
 المضمون صح بس طريقة كلامك و أسلوبك ممكن تكون سبب فى انك تبعد الناس عنه !! 

الفكـرة فى الآخـر اننا مش هنوصل لحاجة من غير حوار لانو عمر ما الناس هيتفقوا على حاجة ..

و عمر ما الحوار هيطلع بحاجة غير لو الطرفين فاهمين انو هما بيعبروا عن وجهات نظر مش عن شخصياتهم

و كل ده لهدف واحد فى الاخر مش لانتصار واحد على التانى .. يعنى من الآخــر ثورتنا لسه مكملتش

عشان لسه للاسف موصلتش للعقـول ..الموضوع مش مجرد احتجاج على الظلم  .. 

لانو لو العقل لو مش نضيف

ممكن يعرف الظلم على انه ضبط قانون .. و الاعتراض و التظاهر بلطجـة 

من الآخــر تفكيرنا كشعـب كامل لو متغيرش مفيش حاجة هتتغير ..