دين الغلابة !

مفيش حاجة فى الدنيـا اسمها الصح المطلق و الغلط المطلق في حاجات كتير مفيهاش أبيض و أسود ..

 التصرف الواحد أحياناً فى موقف يبقى غلط و فى موقف تاني يبقى عين الصواب

ربنا سبحانه و تعالى فى حاجات و أحكام أنزلها واضحة ..و ساب حاجات كتير كده مبهمة مش واضحة تحتمل أكثر من تفسير ده ليه ؟

أكيد مش عشان - استغفر الله العظيم - ملهاش تفسير معين أو يعنى ربنا عاجز يحطلنا فيها قول فصل

و لكن ده عشان ربنا يخلينا نفكر .. عشان الحاجات اللى بتختلف من زمن لزمن

عشان معظم آيات القرآن بتنتهى بـ(( أفلا تتفكرون )) (( أفلا تعلمون )) .. ربنا أمرنا بالتفكير و إعمال العقـل

دين الإسلام هو دين عبودية لربنا بس مش دين غصب .. مش معنى انك تسلم لربنا و تستسلمله انك متفكرش

المفروض انك بالعقل توصل لربنـا .. تعرفه فتحبه فتطيعه .. و الناس اللى عملت كده هى أكتر ناس كانت متدينة و فاهمة الدين صح

المشكلة فى مجتمعنا دلوقتى الواحد مش عايز يفكر .. مش عايز يتعب نفسه .. خايف يفتح على نفسه فاتوحة

طيب ما هى المسيحية و البوذية و الهندوسية هدفهم نشر السلام و الخير

مفيش دين و لا فكر شايف ان القتل و الظلم و الكذب و النفاق حلوين و لا فى دىن بيشجع عليهم ..

و لا في دين بيقولك ابعد عن الخير و لا إيــاك تقول الصدق

لو انت خايف تتعرف على دين تاني و لا منهج تاني عشان خايف على ايمانك يبقى ده ايمان مش ثابت

اعتقادك مش قوي معندكش يقين حتى لو انت مش عارف ده

دايماً يقولك بعد ما تموت و تتدفن فى القبر تجيلك الملائكة تقولك .. ما هو دينك .. من هو ربك ؟؟

ما هو أكيد التحذيرات الكتيرة من الموضوع ده مش من فراغ .. كلنا دلوقتى عارفين مين ربنا و ايه الدين بتاعنا

بس ساعتها انت لسانك بيجاوب بما فى قلبك باللى عندك يقين و اعتقاد ثابت فيه .. و  هى دى الفكرة

المشكلة مش فى انك ميبقاش عندك اعتقاد المصيبة الكبرى  انك تبقى فاكر ان اليقين عندك و هو مش موجود

الخوف من التفكير مش هيحميك من المجهول .. لو كده مكنش ربنا خلقك انسان مفكر و عندك عقل .. لا و كمان أمرك بالتفكر

المشكلة ان الناس بتستسهل .. انا بلاقي فى البرامج الدينية أسئلة غريبة وعن حاجات بديهية جداً  

و بعدين الأسئلة المكررة مثلاً دليل على ان اللى بيسأل محاولش يفكر أو يدور مسبقاً على إجابة السؤال لانه لو دور كان لقاها

فكرة الاستسهال و الكسل عن التفكير بتخلى الناس تاخد المعلومات بالمعلقة من الشيوخ أو أى راجل بتاع ربنا كده

بذقن بيضاء ناصعة البياض .. مع شوية كلمات لغة عربية .. و جزاك الله خيراً و بارك الله فيك أختاه ..

طبعاً السؤال دلوقتى ايه المشكلة فى اننا ناخد معلوماتنا الدينية من الشيوخ ؟! أو يجي واحد لطيف يقولى ازاى تتكلمى كده عن الشيوخ !

أنا مش بقصد بكلامي عامة الشيوخ .. أنا بقصد الناس اللى بتدخل المجال ده بغرض تحقيق الشهرة مثلاُ

و دول ينقسموا لجزئين جزء يتخذ أسلوب الترهيب و يبدأ يتكلم بلهجة قاسية كلمات غير مفهومة من العصور الجاهلية

مع رفع نبرة الصوت و صوت غليظ أجش .. يخوفك من عم الشيخ نفسه .. و كل الكلام على عذاب القبر .. اللى مش منقبة متبرجة

ازاى الراجل يكون من غير ذقن ؟ّ!! و ما إلى ذلك من الفتاوى الغريبة و الفكرة ان الناس تقتنع بالكلام و تردده

لان اكيد اللى دينه متزمت كده هو الصح .. هو ده الاحترام و احنا في زمن منحل .. 

أما التيار التاني .. يمسك فى ناحية الترغيب بس برضه باستسهال .. يصدر فتاوى تريح الناس

يحاول يستهدف الشباب (( فى ناس كويسة مركزة على فئة الشباب طبعاً )) أنا قصدى اللى هدفه يستسهل و يتشهر

و تلاقى الموضوع بيتقلب من ترغيب لمعيلة .. و تبدأ .. انا شايفك ياللى مصلتش على النبي !!

أمـا آخـر فئة أعتقد انها واضحة جداً دلوقتي و متصدرين الساحة .. اللى بيستخدم الدين فى السياسة

اللى بيستخدم الدين عشان يضحك بيه على الناس عشان يكدب بيه !! .. و ده فى نظري أقذر الأنواع

أنا لما أروح لواحد غلبان و بسيط و ثقافته على قده و ده طبعاً بناء على التعليم رفيع المستوى فى بلدنا الجميل

و أقوله بص يا حاج .. الراجل ده بيصلي و بتاع ربنا و هيساعدنا .. أما ده ده بتاع الغرب ده عميل للأمريكان ده علماني !!

الراجل البسيط اللى بفطرته عايز يقرب من ربنا بأى طريقة هيختار إيــه ؟! .. العيب مش على الراجل

و احنا (( الطبقة القليلة اللى عندها أى قدر من الثقافة أو الوعي )) الغلط علينا لاننا موعيناش الناس دى

الغلط مش على الراجل الغلبان .. الغلط مش على اللى بيقبل زيت و سكر .. الغلط مش على حمادة صابر

 و لا على الناس اللى بتخرج تزعق فى مظاهرات الشرعية و الشريعة .. الشرعية و الدستور أى حاجة من الكلام ده

العيب على اللى قاعد فى قناة مخصصها لشتم ناس .. و شتيمتهم لانهم ضد الاسلام .. مفيش مشكلة فى ان الشتيمة حرام

الموضوع يصبح مسموح به مادام فى سبيل الاسلام .. هو بيعامل نفسه على انه حامى الاسلام و رافع رايته و بالتالي أفعاله مقدسة

المجتمع 3 طبقات .. طبقه عليا عندها جزء ضئيل من التعليم و الثقافة 

طبقة وسطى و دى اللى غالبا مكسلة تفكر .. ماشية بالبركة و عايزة استقرار الحال

و الطبقة الأغلب من الشعب اللى همه ياكل و ينام فى سلام من غير ما حد يجي حنبه و لا جنب عياله ..

المسئولية كلها على الطبقة اللى فوق فى توعية اللى أقل منهم عشان يشكلوا قوة تطالب بمطالب واحدة .. و يكون فى ضغط بجد

و يحققوا المطال للطبقة البسيطة دى .. انما مينفعش تطالب ناس بسيطة بانها تنتخب فلان الليبرالي و الاسلامي كخ

ماهو اكيد لما تقوله اسلامي كخ .. هيقول عليك عدو و عميل

احنا انشغلنا بالخناقات فوق و سبنا الناس دى تدخل للغلابة و تتمكن من عقولهم ..

 مش بس بقوا بيحبوهم .. دول عرفوا يزرعوا فيهم كراهية أى حد ضدهم لان اى حد ضدهم ضد الاسلام ..