حوليات #4 ..زمن الروقان

ساعات كتير لما بتخنق من كل اللى حواليا بيبقى نفسي أهرب

أروح فين مش مهم أى حتة !

بس ساعات أكتر بيبقى نفسي أهرب لزمان تانى .. طريقة عيشة تانية

زمن أقدم من كده شوية .. حلوة فكرة زمن الأبيض و الأسود ده

فكـرة انه يوم فى الأسبوع الناس تروح عشان تسمع أغنية أم كلثوم لمدة ساعة و نص مثلاً

وهمـا فى قمة الانشكاح و الروقان .. أعلى درجات الانسجام

و التهليل و التصفيق لو هى قالت بس (( آآآه )) .. يا سلام  .. عظمة على عظمة !

الرجالة لابسين بدل فى منتهى الشياكة و الستات بقى مش هتكلم

مكانوش حلوين فى العصر ده على قد ما كانوا راقيين و شيك !

و طبعاً هستثنى منهم البنات اللى كانوا اوفر مع عبد الحليم xD

جرب بقى تيجي دلوقتى فى سنة 2013 تقرر تلبس شيك و تفصل نفسك ساعتين عن الدنيا

أولاً : مش هتوصل من زحمة الطريق !

ثانياً : الراجل هيفضل مستنى الست ساعة لحد ما تخلص لبس ..

ثالثاً : صعب تلاقي الحد اللى يغني كده أصلاً

بس يعنى و الله ممكن يوم كده حاول تفضي البيت او اقعد فى اوضتك و اقفل على نفسك

قهوتك فى ايدك و شغل اى حاجة قديمة بصوت عالى و اتمزج !

 بجد هتحسسك انك انفصلت شوية عن الواقع الرتيب ده !

حقـاً اننا نفقتد الروقان و المزاج العالى .. المجد لزمن الأبيض و الأسود .. المجد لزمن الروقان !

مستوحاه من 

http://365-posts-7000.blogspot.com/2013/09/blog-post_13.html

حوليات #3 ... عن اللخابيط و الكراكيب

حاسة ان راسي مليانة أفكار ملخبطة و حاجات مكركبة و أسئلة كتيرة مش لاقيالها إجابات

و أسئلة تانية متأكدة إنى هزعل لو عرفت إجاباتها فمش عايزة أعرف !

طول الوقت احساس بالتوهان .. فى زحمة جوه دماغك ..

حاجات كتيرة جواك مش عارف تخرجها ازاى و لا عارف تتصرف معاها 

تحس انك محتاج تتخانق مع نفسك بس مش عارف 

مش فاهم ليه الناس بقت بتتصرف بالشكل ده ؟؟  

الدنيا مش مفهومة فعلاً و لا انت اللى غبي و مش فاهم ؟؟

انت مش حابب الناس و لا قابلهم كده و لا هم قابلينك !

بتحاول تتعايش و تمشي حالك بس مش عارف 

طول الوقت بتعافر عشان تبقى مبسووط و بتفشل !

و ترجع تقول الدنيا قصيرة و مش مستاهلة كل التعقيد ده 

تصحى فى يوم مزاجك حلو و تيجي حاجة صغيرة تفكرك او تنرفزك فتقلب كل ده

ازاى اتحولت من الكائن المتفائل اللذوذ ده اللى شايف الحياة وردي

لشخص كئيب و قاتم و شايف الحياة أبيض و أسود !

مع الوقت حاجات هتفهمها .. 

 و مع الوقت حاجات هتقرر انك مش عايز تفهمها أصلاً

بقالى فترة مش بكتب .. ايوة انا مش كاتبة كبيرة و مهمة يعنى فده مش هيأثر فى الكون

بس يفرق معايا انا حتى لو كنت بكتب وحش

 بس دى الحاجة الوحيدة اللى بحس انى برتاح و انا بعملها ..

بحس انى انا من غير قيود كده و لا حد واقفلى هينتقدنى و يحكم عليا !

 الحياةاللى احنا عايشنها عندها قدرة انها تنسينى اعملها او تحسسنى انى مليش نفس 

تحسسك  انك ماشي فى متاهة ..

 الحياة الروتينية دى بتسحب روحك حبة حبة من غير ما تحس !

و فجأة تيجي حاجة تفوقك شوية بس بترجع تانى !

حاسه ان أكبر و أهم معركة فى الحياة  .. انك تحافظ على انك متتحولش للكائن اللى ماشي مش حاسس بنفسه ده

انا مش عايزة اكبر ابقى الست اللى ماشية شايلة اكياس كتير و بتكلم نفسها فى الشارع و محتاسة !

تحسنا بقينا اوتوماتيك ماشيين كده و خلاص !

 لا ماشيين ايه .. لا ده احنا بنجرى و متفهمش بنجري ورا ايه !

و لما نفوق نفوق على كراكيب و افكار بقت متربة فى دماغنا من كتر ما احنا مطنشينها

او عاملين نفسنا  مش مهتمين او خايفين نواجهها !

أهم خناقة لازم تكسبها انك تكسب نفسك ..

بس على فكرة الحاجة الوحيدة اللى انا متأكدة انه الحياة مش بتتفهم .. الحياة بتتعاش !

من وحي تدوينة 

مش فاهمة حاجة!

على فكرة يا أمانى كلنا مش فاهمين حاجة  !!