الأربعاء، 30 يناير 2013
امشى جنب الحيط ..
خليك ماشى جنب الحيطة يابنى
جملة مصرية أصيلة .. تسمعها أكتر فى المسلسلات ممكن تكون متقالتلكش فى الحقيقة بس أهلك حاولوا يوصلولك معناها ..
اللى بينصحك بيهـا قصده مصلحتك .. و خصوصاً الأم اللى بتقولها لأولادها من خوفها عليهم
و لكن لو فضلنا خايفين على نفسنا و على اللى بنحبهم من كل حاجة مش هنعيش كده !!
فكرة انك تعيش فى الحياة على جنب .. جنب الحيطة عاملة زى ما تكون عايش كأنك ظل بني آدم
متعرفش تاخد قرار جرئ خوفاً من اللى ممكن يحصل .. متتصرفش تصرف على غير العادة عشان (( مينفعش )) !!
أصلاً يعنـى احنا عايشين اد ايه عشان الشوية اللى عايشينهم دول نعيشهم جنب الحيطة ؟!!
اوعى تمشى جنب الحيطة .. اوعى تخاف تعبر عن اللى جواك
حتى لو طلعت حاجة غلط .. او الناس اتريقوا عليك مخسرتش حاجة
على الأقل اتعلمت حاجة جديدة .. دخلت تجربة مختلفة
الحياة قصيرة اوى انك تحط لنفسك قيود ملهاش أساس و لا أصـل و كل اللى هتعمله انها هتعيشك نص عيشة
عيشة مش بجد .. ناقصها حاجات كتير .. ناقصها انك تكون على طبيعتك .. ناقصها أنت ..
ارحـل يعنى امشى !!
ارحل يعنى امشي .. ياللى مابتفهمشى ..
شعـار مصرى أصيل اعتاد الشعب أن يردده كل عام منذ ثـورة 25 يناير فبـدأ مع المخـلوع مبارك فى عـام
2011 مروراً بحكمـ المجلس العسكرى فى 2012
و الآن نشهـده مرة أخرى فى مطلع 2013 مع حكم جماعة الإخـوان المسلمين المتمثل فى الرئيس (( محمد مرسى ))
و قد نجح هذا الشعار فى اسقاط مبارك و بالنسبة للمجلس العسكـري ساعدت فى تسريع نقل السلطة عن طريق انتخابات. و لكـن الآن هذا الشعـار مُختلَف عليه .. لانه ضد رئيس مدنى منتخب فى انتخابات حرة نزيهة (( على حد قولهم )) و لأنوو لو قلنا كده لكل رئيس أو حاكم مش هيقعدلنا رئيس (( برضه على حد قولهم )) الصـراع القائم هنا و الناس اللى بتبرر للحاكم .. مش من حبهم فيه و لكن ده حاله من الملل و الاختناق و الزهق من اللى وصلناله فى البلد من سنتين و داخلين فى الثالثة من عدم الاستقرار و العنف المستمر و عداد الشهداء الذى لا يتوقف
و لكــن الموافقة على التعديلات الدستورية .. مجبش استقرار و الموافقة على الدستــور .. مجبتش استقرار
يبقى السكوت على اللى بيحصل و اعطاء الرئيس فرصه .. هتجييب ؟؟!!
و بالنسبة للى بيدعوا للحوار انا مش عارفة حتى لو نتج عن الحوار توافق و قرارات .. طب و مين مسئول عن اللى ماتوا بداية من أحداث الاتحادية و اللى لسه حتى الآن موقفش موتهم ..
وجـود حضرتك فى البيت على الكنبة بتابع الأحداث من التليفزيون أو النت (( دى مش إهانة على فكرة و أنا كمان زيك )) بيفرق كتير جداً عن وجود شباب من أول 13 و 14 سنة لحد الثلاثينات فى الميادين أصحابهم بيتقتلوا قدامهم لمجرد انهم طلعوا يتظاهروا بسلمية ضد أوضاع متغيرتش من سنتين و (( رئيسك المنتخب )) تعهد بتغييرها ..تعهد بإعادة الأمن و إصلاح المرور و توفير العيش و البنزين و حاجات تانية كتير لما الرئيس بنفسه اللى يلزم نفسه بتحقيق ده فى 100 يوم و ميحققوش فى 4 شهور يبقى من حقـى انزل و اطالب بتحقيق المطالب دى اللى هى مشروعة جداً و منطقية جداً .. و للعلم أغلب المتظاهرين مش من الناس اللى وقع عليهم ضرر مباشر من المطالب دى. لما تيجى بعض عناص الشرطة تواجههم بالعنف .. و يطلع الرئيس يطلق عليهم بلطجية و ثورة مضادة .. ماشى متعودين على ده انما قتل الناس بشكل غير طبيعى ده غير مبرر أبداً .. و طبعاً يفقد الحاكم شرعيته .. الحاكم اللى اختارته الصناديق و بيقتل شعبه أســوأ بكتير من الحاكم اللى مخترناهوش و بيقتل شعبه .. على الأقل كان جاي غصب عننـا .. الفكــرة هى .. انو صناديق الانتخابات هى اللى اختارتك و لا الشعب اختارك دى مش رخصـة انك تقتله و الشعب زى ما جابك .. يقدر يمشيك
على ذكـر صناديق الانتخاب و موضوع الأغلبية اللى ذالنا بيه .. أين ذهبت هذه الأغلبية ؟!! و ما سر هذا الاختفـاء المفاجئ ؟!
مش واجب الأغلبية برضو تقف بجانب الشعب فى أزمته و لا إيـه ؟؟ عدمـ وجود أحزاب غيركم و انعدام المنافسة لا يصنع أغلبية!!
اللى ثبت على مر الأعوام انوو الحاكم بييجي عند نقطة المطالبة بالرحيل و (( مابيفهمشى )) و لكن الحقيقة أنو (( عامل مش فاهم )) و هى سياسة بيلجأ لها الحكام لما يواجهم الشعب بالرفض
بس فى الأخــر يعنـى هيفهم و يرحـل .. ازاى معرفش بس اللى اعرفه انو دم الناس دى مش هيروح بالساهل ..
الجمعة، 25 يناير 2013
25 يناير برضه ..
النهاردة يـوم 25/1/2013 فات بالظبط سنتين على الثـورة .. محسيناش بيهم
و لا شوفنا فيهم حاجة مختلفة عن اللى قبـل كده و عشان كده احنا حاسين انو
بقالنا سنتين فى ثورة .. مش عدّا على الثـورة سنتيـن ..
بس أكييد أكييد فى شوية حاجات و لو صغيرة اتغيرت من بعد الثورة يعنى !!
جيت أفكـر لقيت انو أكتر حاجة اتغيرت هى الوعى ان الناس بدأت تفهم ان السياسة و المظاهرات و الانتخابات دى مش حاجة كده للناس اللى بتيجى فى التليفزيون بس ..
لا ده عادى جداً على فكــرة و كلنا مفروض نشارك فيها.. أينعم الوعى ده موصلش لكل الناس (( بدليـل نتائج الاستفتاءات و الانتخابات )) و لكـن أكيد الوضع أحسن من الأول
على الأقـل بدل ما كان خيار التظاهر و الاعتصام ده مش مطرووح أصلاً ..
بقينا بنتناقش هتنزل و لا لأ ؟؟ .. طب انت مع اللى فى التحرير دول و لا لأ ؟؟
أكيد محدش فرحـان بعدم الاستقرار (( زى ما بيسموه ))
أو بالناس اللى عمالة تموت كل شوية سواء بإصابات فى أحداث و مظاهرات أو إهمـال (( عد عدد القطارات اللى موتت ناس من 6 شهـور ))
بس مش الحل السكوت و لا الرضا بالأمر الواقع .. لانو لو رضينا على اللى بيحصـل ده
بصــراحه ساعتها نبقى نستاهل اللى بيحصلنـا ..
الاشتراك في:
الرسائل (Atom)