رجعـت الشتوية =)

فجـر يوم 31 يناير 2013 .. الساعة دلوقتى 4 فجراً

فيـه مطر رهيب و رعد و برق .. برضه الشتاء ليه هيبته

الشتاء الجامد ده فكرنى بخناقاتى الدائمة مع صاحبتى على انو مين أحسن الصيف و لا الشتاء ؟؟

و اللى كنت بدافع عن الصيف و بقـوة فيها .. حجتى : الشتاء طينة بقى و سقعة و برد و جو من ده !!

ترد هى و (( على وجهها الامتعاض من حر الصيف و تلزيقه )) : لا بس احساس الدفء بعد ما تبقى سقعانه ده فظيع ..

المهمـ فضلنا نتخانق كتير لحد ما اقتنعت بانوو فعلا الشتاء أحلى (( و لسه مقولتلهاش انى اقتنعت على فكرة :D ))

الشتاء فيه احاسيس كتيرة بتعملك دمااغ كده من غير ما تفهم ازاى !!

 

الشارع و هو فاضى و انت الوحيد تقريباً (( العبيط )) اللى ماشى فيه و مش فارق معاك انك تتبل !!

ريحـة الشتاء و منظر الشوارع و الشجر شكلهم نضيف .. و الشوارع بتلمع رغم الطينة اللى فى الأرض !!

الشتاء اللى يجى فجأة بعد ما الشمس كانت منورة .. و يتبادر اللى حواليك بسؤالك .. هاا دعيت ربنا ؟؟

لمة العيلة بالليل فى الدفا حتى لو بيتفرجوا على تليفزيون .. و صوت الشتا بره ليه طعم تانى ..

 

الشتاء فيه رووح كده حلوة مش موجودة فى الصيف .. فيه احساس بعظمة ربنا .. فيه احساس كده انت مع نفسك و بس

بالرغمـ من كآبته بس بتحس فيه انك فى عالم تانى ..

احساسك و انت تحت البطانية و اللحاف المعتبرين .. رجلك جوة لكلوك و مستبعدش يكون تحته شرابين

و حضرتك مدفي بثلاثة او اربع طبقات من اللبس (( واحدة او اتنين بس لو مبتحبش الكلكعة ))

و فى ايدك مج النسكافية او الشاى (( على حسب ميولك برضوو )) 

يا سلام لو جنبك صوت فيروز >> برضوو فى الشتاء ليها طعم تانى يا أخـى !!

و فى إيــدك كتاب لكاتبك المفضل .. نفس الكتاب اللى مكملتوش و بتكسل تكمله بس جالك المزاج فى الشتاء ده !!

صـوت فيروز + ريحة القهوة + العالم التانى اللى بيدخلك فى الكتاب >> و صوت الشتاء من برة عالم تانى ميتعوضش بصراحه..

 

و من هنـا بعترف بصـراحه انوو الشتاء أحلى من الصيف ... =)