الخميس، 7 نوفمبر 2013

اعتـــراف ..


تحذيـر :

(( محتوي ربما يكون مملاً بعض الشئ و كئيباً أيضاُ ..
 إن كنت تحافظ على وقتك لا أنصحك عزيزي القارئ باستكمال هذه التدوينة ))


النهاردة .. عودة لكيبوردي الحبيب بتاريخ  7 نوفمبـر
آخـر مرة زرت فيها مدونتى كانت 13 سبتمبـر !!

تقريباً شهرين مبدخلش هنا و لا بكتب على ورق حتى
حاسة انى بقالى كتير فى حالة غريبة بس متوقعتش انه كتير يعنى شهرين !!

شهرين عبارة عن حاجات تلهيني حاجات بحاول اسهى بيها دماغي اللى مش بتبطل دوشة
جواها كمية حاجات مزعجة .. احلام .. طموحات .. ذكريات .. انتقادات .. و الأكتر من ده كله تساؤلات
بس معظمها بلا إجابة .. بحثت عن إجابة بعضها و فشلت و البعض الآخر بخاف أعرف إجابته أصلاً

كل يوم اقول هبدأ من بكرة و مش ببدأ .. لأن المشكلة مش فى الكسل انى اعمل حاجة
المشكلة فيا انا .. انا مش متصالحة مع نفسي و مش حاباها .. ليه معرفش بس هو كده !! تقدر تقول غلاسة

شايفة ان كل حاجة فيـا ملهاش لازمة ..
 وجودي فى  الكون صدفة (( وحشة ))
و هتنتهى فجأة و محدش عارف و لا حتى انا !

شايفة أى حاجة بعملها سخافة .. بلا اى فائدة تذكر .. عارف انت مثلاً الحاجة البايظة اللى مينفعش تتصلح
لا بتتصلح و لا بتترمي .. اهى موجودة كده و خلاص .. ليه معرفش !

شايفه فكرى سخافة .. شكلي سخافة .. لبسي سخافة .. هزاري سخافة ..
 حتى انى اقعد اكتب تدوينة كاملة عن نفسي منتهى السخافة !!
مين اللى مضطر يقرأ هذا العبث !!

دايماً عندى اعتقاد ان كل حاجة ربنا خلقها لسبب معين مهما كان صغير محدش هيعرف يعمله غيرها
لو شفت حد قدامى حاسس بنفس اللى انا حاساه هقوله الكلام ده و انا مقتنعة بيه
بقف عند نفسي و  مبفتنعش

عارفة ان ده غلط عارفة اى الصح .. بحاول ادور على حاجة تلهمني
 افلام .. مدونات تانية .. مواقع على النت
اغانى .. برامج .. نصائح أصدقاء .. بس مفيش ..
 كأن كل الكون ده دوشة كتيرة اوى و انا محبوسة فى علبة ازاز
سامعة صوت تشويش بس مش عارفة اتعامل معاه ..
 و هتخنق من الوحدة فى الصندوق ده !!
 برغم انى شايفة اللى برة و هما شايفني بس فى حاجة غلط

طبعاً هتقولى الحل القرب من ربنا ..
المشكلة انى حاسة انى مستاهلش أقرب منه ..
 لما بشوف الناس اللى من وجهة نظري قريبين بجد من ربنا ..
 بندهش من مدي النقاء اللى هما فيه ده .. بحس روحهم شفافة
اد ايه عارف حجمه بالنسبة للكون و لخالقه و فى نفس الوقت حاطط كل حاجة تحت رجليه عشان يروحله بس يحس بالقرب منه !
و عمرى ما هوصل لربع ده حتى !

عارفة انه تقصير مني و ممكن كسل و ممكن غباء
و اخر حاجة ممكن اكون كاتبة التدوينة دي عشانها انى اصعب على حد
او حد يرد ردود من نوعيـة
 (( معلش .. حبي نفسك .. ايه الاوفر ده .. ))
 او احنا مالنا و مال الهرى ده !!

كل الحكاية انى قررت احاول اتصالح مع نفسي .. مادام انا مقتنعة ان كل روح فى الكون ليها لازمة حتى الاشرار
يبقى اكيد انا ليا .. و اكيد مادام انا مش متقبلة نفسي محدش هيتقبلني .. 

بصراحة الفضل فى انى افكر اعمل كده اتنين ..
صاحبتى الاول معرفش هتشوف التدوينة دى و لا ..
بس هى بسبب انها الوحيدة اللى حتى الآن مزهقتش منى و دايماً
بتحاول تخليني اتصالح مع نفسي و بتفشل بسبب غتاتي المعهودة و اكتئاباتي المتكررة فبتضطر تزهق و تهزأني ...

تانى حاجة التدوينة دي
بالرغم من انها ممكن تكون كئيبة شوية اى محبطة بس جاتلى فى وقتها
أدهشتنى القدرة على الابداع من لا شئ .. 

عارفة انى هريت كتير .. بس انا يمكن كاتبة ده لنفسي بس
 و منصحش أى حد يضيع وقته فى الكلام الفاضي ده
مجرد انى اكتب اى حاجة او بمعني اصح اطلع شوية من اللى فى دماغى ارهقنى جداً ..
 بس معرفش بس مادام تعبت كده و بذلت مجهود مهما كان وحش ..
 عندى احساس انى ع الطريق الصح .. او يمكن لا .. ربنا يسهل !!

و أتمنى التدوينة دى تبقى بجد بداية جديدة مش زي كل مرة اقول بداية جديدة و مكملش انى احاول ادور على نفسي
اعرفها الاول و اكتشف جوة فى ايه و اتصالح معاه  (( مش كليشيهات و الله بس بجد ))
ارجع تانى ادور على الحاجات و التفاصيل الصغيرة اللى بتدي الكون معنى (( جملة صاحبتى بردة عشان مكنش سرقتها xD ))
اعمل الحاجات اللى بتفرحنى .. موقفش حياتي على الناس .. ماخدش مواقف منهم عشان مفيش حاجة مستاهلة
و ارجع علاقتي بربنا زى الاول .. اعرف انا بجد بحب ايه و بكره ايه ؟! .. ارجع اقرأ كتير زي الأول 
أسيب نفسي كده زي ما انا .. من غير انتقاد .. من غير ماخد منها موقف !
حاساه مشوار طويل بس لو مبدئتوش دلوقتى حالاً هبدأوه امتى ؟؟ 






هناك 6 تعليقات:

  1. انت بحاجة تكتبي كتير تدوينات متل هي التدوينة .... كتير ... , بس بشرط ما تهتمي بكلام الناس , و تكتبي اللي جواتك فعلا ً
    التدوينات اللي عم سميهن عبثيات ... هنن تدوينات بنفس واحد : يعني بكتب بدون تفكير و ما بوقف إلا لأحد أمرين : إما لانقطاع استرساال أفكاري .. أو لتصحيح خطأ إملائي واضح ....
    هي التدوينات تدوينات تفريغ ....
    جربي تفرغي اللي جواك ِ , منشان تقدري تمتلي بتفاصيل الحياة الصغيرة اللي بتعطي الكون معنى ...

    ع فكرة تعليقي هاد فكرت فيه لأكتر من ساعة قبل ما ابعتلك ياه , لأنو كان بدي الكلام يكون صافي .. لا طويل و لا قصير ... و ما فيو أي حشو زايد ... إنما الخلاصة النقية النهائية

    ردحذف
  2. بعد ما كتبتها نوعاً ما ارتحت .. عندك حق ممكن
    المشكلة فى فكرة انك تسيب الافكار لوحدها تخرج كلام كده من غير قيود صعبة جداً و متعبة
    بس ممتعة فى نفس الوقت .. هحاول اشتغل على ده

    و بالنسبة للعبثيات دى بحسها بتوصل حاجات كتير و بتأثر بشكل أو بآخر .. تقريباً بتبقى عبثيات فى نظر اللى كاتبها بس

    فرحنى التعليق ده بصراحهـ .. لانه تدوينتك صاحبة الفضل فى انى اكتب ده
    و ربنا يسهـل =))

    ردحذف
    الردود
    1. لما حد يقول أن ترك الأفكار ..... !$#$ , بصي , الجملة التانية في كلامك مستفزة ليا أوووي !
      بتخلق جواتي رغبة في إني أغصب قائلها ع الكتابة
      لأنو ما حدا بيعرف أنو الخطوة هي ... الكتابة بدون قيود ... هي اللي بتضمن خلاص الإنسان من قيودو و للأبد

      حذف
  3. و عشان كده هى مش سهلة
    و خصوصاً لو الكلام عن نفسه ..

    ردحذف
  4. مش هقولك غير حاجة واحدة بس
    أنا بقالي فترة طويلة اوي بعاني من نفس الحالة بتاعتك حتى لو كانت بتفاصيل تانية لكن الحالة هي هي
    أنا لسة ما خرجتش منها اوي بس بحاول
    الكتابة حاجة مساعدة والقراءة حاجة مساعدة والصلاة حاجة أساسية وطبعا كلنا عارفين الكلام ده عشان كده مفيش داعي تقرأي التعليق الممل ده
    مش فاضل غير حاجة واحدة يمكن محدش قالهالك ( غرفة مظلمة ونور خافت وسكون على شرط انك تكوني شاربة قهوة علشان ما تناميش واسرحي مع نفس اعملي مراجعة قاسية مع النفس بس في الوقت رحيمة علشان ما تخليش اليأس يتمكن منك وكل ما توصلي لنقطة مهمة اكتبيها وسبحي ونامي )
    ممكن ( مش أكيد ) بعد الوصفة دي تحسي بفرق
    أنا شخصيا لسة ما جربتهاش بس بسعى جاهدة اني اعملها رغم ان الأجواء عندي مش بتساعدني
    أنا مش عايزاكي تزعلي مني ( كان نفسي أقولك حاجة تخرجك فعلا من الحالة دي )
    تحياتي :)

    ردحذف
  5. على فكرة انا فعلاً لما كتبت هنا بدأت احاول مع نفسي عشان اخرج
    و رد حضرتك فرحنى بصراحة مكنتش متوقعة انك تشوفيها =)))
    الفكرة اللى بتقولى عليها بتاعت الاوضة الضلمة محتاجة انفذها فعلاً
    بس حاسة لسه معنديش الشجاعة اواجه نفسي بالقدر ده

    بس عملتها قبل كده على فكرة و كانت نفعت معايا نوعاً ما

    شكراً ليكـي .. =))

    ردحذف